deur Bernard Venter

Geluk by die ongeluk bring vir Johan ‘n nuwe motor in die sak!

Ware hengelaars bly maar ‘n unieke spesie. Ondanks uiters ongunstige hengeltoestande, in reën en koue, daag daar nog ‘n duisendstuks hengelaars by die Vaaldam Bonanza by Jim Fouche vakansie-oord op. Geen wonder dat Jesus dit goedgedink het om uit vissermanne sy dissipels bymekaar te maak. Terloops, die vissermanne in die Bybel se tyd het bekendgestaan as die “seuns van die donder”, omdat hulle sulke geharde en onverskrokke mense was. Ek dink ons sien hierdie eienskappe in baie van ons hedendaagse hengelaars. Mense met uithouvermoë wat selfs teen die verwagting, wanneer hengeltoestande ongustig blyk te wees, sal aanhou probeer om hulle sport te beoefen. Miskien is dit juis hierdie eienskappe wat hengelaars sulke merkwaardige mense in ons samelewing maak.

Die hengelaars wat die Vaaldam Bonanza bygewoon het, is egter met mooi vis en goeie pryse beloon. Ons land het die reën baie nodig gehad en dit was miskien ‘n gelykmaker tussen die deelnemers. Die vis het heel skaflik uitgekom, met heelwat karps tussen 5-6 kg en ‘n paar wat amper 7kg gemaak het. Die babers was kleiner as vorige jare met Jaco Venter, se baber van 14 kg die grootste. Die toernooirekord staan op bykans 23kg, so twee jaar terug deur Joe Mitton gevang. Dit was goed om weer ‘n slag die eerste prys, ‘n Focus Centre Console motorboot geborg deur Boat, Carvan and Camping (Nigel) en Yamaha, aan ‘n oewerhengelaar te oorhandig. Die eer het Jaco Venter te beurt geval. Hy het sy baber met ‘n karp viskop gevang. En die geheim volgens Jaco is om diep in te gooi en en die aas lank te laat lê!

Die “Big Banger” prys is vir ‘n tweede jaar in ‘n ry by die Vaaldam Bonanza gewen! Johan Roodt kon sy oë nie glo toe hy ‘n splinternuwe Kia Shuma II, geborg deur Kia Motors (Vereeniging), wen. Om die prys te wen, moes ‘n hengelaar ‘n karp met ‘n spesifieke gewig wat tydens die prysuitdeling getrek is, vang. Die geluk het Johan met sy mooi karp van 5,12kg te beurt geval. Johan kon sy geluk nie glo want sy motorboot het op die water onklaar geraak en was dit nie vir sy broer Herman wat hom terug getou het nie, sou hy nooit die wenvis kon weeg om die motor te wen nie!

Een van die heel beste pryse by vanjaar se Vaaldam Bonanza was die oulike Moway sleepwaentjie. Die bakwerk van die Moway sleepwaentjies word van duursame polymeer, ‘n soort van plastiek – net baie meer duursaam, gebou. Ek was aangenaam verras met die nuwe generasie sleepwaentjie. Dit is eerstens ligter en stewiger as die konvensionele staalplaat sleepwaentjie, roesvry, gebou op ‘n stewige basis en beskikbaar in ‘n groot verskeidenheid kleure en modelle. Laastens is dit boonop goedkoper as meeste konvensionele sleepwaentjies. Die gelukkige wenner van die Moway sleepwaentjie was W Olivier.

Soos al gebruiklik by Eko-Care hengelkompetisies was die Eko-Care Hengeltabel weer gebruik. Die voordeel wat die hengeltabel inhou, is die geleentheid wat dit aan hengelaars gee om vir karp, baber of moddervis te hengel en met enige een van die visspesies die groot prys te kan wen. Vanjaar is 11 van die 20 pryse gewen deur karps, een deur ‘n moddervis en nege deur babers. Die organiseerders het die eerste 20 pryse gelykop gedeel in tien vir oewerhengelaars en tien vir boothengelaars. Aangesien sekere visspesies, soos babers, die vorige Bloemhofdam Bonanza oorheers het, is besluit om voortaan by damme waar dit nodig is, addisionele punte aan ander visspesies soos karp toe te ken.

Ons het weereens daarin geslaag om danksy ons borge uitstekende pryse by die Vaaldam Bonanza toe te ken. Afgesien van reeds gemelde borge dink ons aan ou staatmaker borge soos Shimano, Conoflex, Double XX, Pertec Intenational, MG Angling, Makro, Paindane, Holiday Club, Dolphin Fishing Tackle, Fuch Lubricants, Standard Foundary, Multipin, Fast Sails, NCS Resins, maar ook aan nuwes wat bygekom het, soos, Front Runner 4X4, Kingfisher, Daiwa, Surecatch en Mias.

Links: Terwyl die hengelaars vis vang soos die een deur Lourens Swanepoel, hou die gesin hulself besig (bo) met ander aktiwiteite wat Jim Fouche oord ook bied.

Sonder hengelaars en borge kan daar nie ‘n hengeltoernooi wees nie. Goed georganiseerde hengeltoernooie is van groot belang vir die groei van die hengelsport. As organiseerders van die grootste en mees suksesvolle binnelandse hengeltoernooie kan ons daarvan getuig hoeveel nuwe bloed met sulke hengeltoernooie in die hengelbedryf invloei. ‘n Groot hengeltoernooi wek ongekende belangstelling landswyd en letterlik honderde navrae word vooraf, veral van nuwe hengelaars ontvang wat skielik lus kry om na die hengelkompetisie te gaan. Hengelwinkels kan getuig van die nuwe voete (en ou klante) wat opdaag om hengelkaartjies by die afsetpunte, gewoonlik hengelwinkels, te koop. Sodoende word omset verhoog, hengelwinkel baat daarby asook die verskaffers (ons borge) wat weer die hengelwinkels bedien. Hengelaars is die kopersmark wat graag ons borge ondersteun. Hulle sien wie die borge by ons hengeltoernooie is en sien dat ons borge hulle sport ondersteun. Sonder goed georganiseerde hengeltoernooie sal die hengelsport ‘n groot bemarkingsgeleentheid mis en verseker veel armer daaraan toe wees. Die voorwaarde is egter om dit goed georganiseerd te kan doen. Daar is ongelukkig te veel hengeltoernooie wat nie aan die standaard voldoen nie en ‘n verleentheid vir die hengelsport is.

Tydens vanjaar se Vaaldam Bonanza is besondere moeite gedoen om deur middel van persoonlike onderhoude met ons deelnemers vas te stel wat hulle van sulke hengeltoernooie verwag en wat ons kan doen om dit meer suksesvol aan te bied. Die goeie nuus is dat ons net komplimente van 90% van die deelnemers ontvang het. Die voorstelle wat vanaf die deelnemers ontvang is, sal ons by toekomstige hengeltoernooie implimenteer.

Die Vaaldam Bonanza is deur Eko-Care Trust en Gauteng LGB aangebied. Die fondse wat gemaak is, is aangewend vir omgewingsbewaringsprojekte en die bevordering van die hengelsport. Vir meer inligting oor die toernooi kan lesers gerus op die webwerf www.outdoorpages.co.za gaan loer. Die SAPS Watervleuel Oranjeville en Ambulansdienste Frankfort word bedank vir hulle onbaatsugtige dienste.

Die SPAR Bloemhofdam Bonanza wat ook deur Eko-Care Trust gereël word, vind vanaf 24-26 September 2004 plaas. Dit gaan vanjaar uit twee opeenvolgende (back to back) hengelkompetisies bestaan. Op die Vrydag begin die eerste hengeltoernooi met ‘n spanne kompetisie. Enige vier mense kan ‘n span vorm. Op Saterdag volg die groot Bonanza tot Sondag. Vanjaar is daar ‘n spesiale afdeling vir vrouens en juniors met groot pryse as deel van die Bonanza. Sien die volblad advertensie in Stywe Lyne vir meer besonderhede. Moet dit nie misloop nie!