Die erdwurm is sekerlik die algemeenste van alle hoek-ase in die geskiedenis van hengel, om die eenvoudige rede dat dit een van die natuurlikste bronne van voedsel vir die meeste visspesies is. Dis daarom dat wurms tot vandag toe met groot sukses gebruik word. In dié uitgawe vestig ons die aandag op ‘n paar wurmwaarhede en bekyk ons spesifiek die Kariba- en die slangwurm, soos hulle bekend staan.

Die Slangwurm (bo) en die Kariba Wurm (onder)

Agtergrond

Die wurm is ‘n semi-amfibiese dier, wat beteken dat dit taamlik goed tuis is in die water. Suurstof word deur die oppervlak van die liggaam uit die nat grond geabsorbeer, daarom kan wurms taamlik lank onder water aan die lewe bly.

Die wurm het ‘n kop- en ‘n stertgedeelte: die kopgedeelte is die naaste aan die saaltjie. Die wurm het ook ‘n kenmerkende geur; dit is dié geur wat dit vir die vis ‘n onweerstaanbare dis maak.

Soos reeds genoem, kan feitlik enige varswatervisspesie met ‘n wurm gevang word, daarom is wurms so ‘n gewilde hoekaas.

Wurms is veral na ‘n goeie reënbui ‘n goeie aas om te gebruik. Die reën laat die wurms na die oppervlak van die grond beweeg en hulle word dan deur die reënwater afgespoel na die dam of rivier waar dit ‘n natuurlike voedselbron vorm.

In sekere damme, byvoorbeeld Vaaldam, is wurms doeltreffender as in ander omdat wurms in groter mate natuurlik rondom die water voorkom. By sulke damme kan meer met wurm-ase geëksperimenteer word.

Wurms as hoekaas

Basies bestaan daar twee hoof aanbiedingsmetodes van wurms:

Metode 1

Hou ‘n wurm aan die kopgedeelte tussen die duim en wysvinger vas en knyp ‘n stukkie (sowat 5 mm) af.

Laat sowat 10-15 mm toe van waar die wurm afgeknyp is en steek die hoekpunt daar in die wurm in en ryg dit teen die hoeksteel op totdat dit teen die hoekoog vasdruk. Steek die hoekpunt na buite en trek die wurm teen die lyn op sodat die hoekoog binne-in die wurm weggesteek is. Dié metode laat die wurm op ‘n baie natuurlike wyse op die bodem lê.

Die geheim met die afknyp van ‘n stukkie van die kopgedeelte is dat die sappe van die wurm baie gouer in die water vrygelaat word, wat die vis baie gou ondersoek na die reuk laat intel.

‘n Tweede wurm kan aan die hoekpunt geryg word as ‘n groter aas velang word. Ander ase kan met dié metode gekombineer word deur byvoorbeeld ‘n degie agter die wurm om die lyn te rol.

Metode 2

Ryg ‘n wurm soos in metode 1 aan die hoek, gevolg deur nog drie tot vier wurms sodat ‘n tros wurms gevorm word (knyp ‘n stukkie van die kopgedeelte van elke wurm af). Dit vorm ‘n baie groter hoekaas wat vir byvoorbeeld geelvis- of baberhengel gebruik kan word.

Pop-up wurms (bo) Metode 2 (links)

“Pop-up” wurms

Gebruik ‘n inspuiting om die wurm vol lug te spuit sodat dit van die bodem oplig.

Spuit klein hoeveelhede lug in die wurm in deur by die stertgedeelte te begin en terug te beweeg na die middel, waar die hoekpunt uitgesteek word.

 

Wurms aanvullend tot grondvoer

Al ooit van “Chopped Worm” gehoor? Dié metode gee die hengelaar die geleentheid om wurms ook in die grondvoer te gebruik. As die vis op ‘n bepaalde dag regtig ‘n voorkeur vir wurmhoekaas het, kan die volgende metode dalk net ‘n verskil maak teen inweegtyd.

Stap 1

Stap 2

Stap 3

Stap 1: Neem ‘n hand vol skoon wurms en knip hulle met ‘n skêr in stukkies van sowat 10mm.

Stap 2: Voeg die “Chopped worm” by die grondvoer en meng goed deur.

Stap 3: Maak seker dat die grondvoer steeds goed bind. Die foto toon hoe die uiteindelike produk daar uit behoort te sien. Berei “Chopped worm” in klein hoeveelhede voor soos die behofte daarvoor ontstaan sodat dit altyd so vars moontlik in die grondvoer gebruik kan word.

Topwenke

1. Moet nooit die wurmhoekaas in enige botteltjie lokmiddel doop nie: die wurmvloeistof reageer met die lokmiddel wat veroorsaak dat die geurgehalte van die lokmiddel aangetas word.

2. Haak die afgeknypte punt van die wurm aan die punt van die hoek sodat die wurm nie teen die hoeksteel afskuif nie.

3. Bêre jou wurms in ‘n koelhouer met ys tydens jou hengelsessie sodat dit vars bly.

4. Soek die dag voordat jy gaan hengel genoeg wurms vir “gekapte wurm” – grondvoer uit en plaas dit in ‘n klein houer met nat grondvoer daarin. Die wurms is dan reeds skoon as jy dit tydens die hengelsessie wil gebruik.