Die hengelkas het deesdae ‘n baie spesiale item van ons hengelaars se gerei geraak. Die rede daarvoor is dat die hengelkaste saam met die staander wat deesdae so spesifiek gemaak word om jou voorkoms en hengelprestasie te verbeter.

Die hengelkaste kan van verskillende materiale gemaak word, naamlik Hout en veselglas. Elkeen van die materiale waarmee die kaste vervaardig word, het verskillende eienskappe en dus ook unieke voordele en nadele.

Veselglaskaste

Voordele

• Die kaste kan nie deur water beskadig word nie.

• Die kaste kan in ‘n spesifieke kleur vervaardig word. Die pigment is binne die veselglas, wat die kleur langer behoue laat bly.

• Die kaste is ligter.

• Die kleurlaag kan vervang word teen ‘n minimale koste.

• Die uitleg binne kan jy self beplan en toerus.

Nadele

Houtkaste

Botteltjies is netjies genommer en die lys is teen die deksel geplaas

Spaar stroppe word gewoonlik in een van die laaie geplaas

Voordele

• Die kaste wat behoorlik behandel is, kan nie deur water beskadig word nie.

• Die kaste kan in ‘n spesifieke houtsoort na jou smaak vervaardig word.

• Die kaste se buite en binne uitleg kan na smaak vervaardig word.

• Die kaste vertoon baie netjies.

Nadele

My aanbeveling is dat indien jy die keuse van jou tipe kas maak, dat jy ‘n betroubare hengelkas vervaardiger se produk aankoop en nie noodwendig die goedkoopste nie. Ek kan jou verseker dat die goedkoper opsie, gaan veroorsaak dat jy verseker weer gaan koop.

Inhoud van die Hengelkas

Weens die groot verskeidenheid van konsentraat vervaardeigers, gaan ek nie aanbeveel watter fabrikaat gebruik moet word nie. Die verskeie fabriseerders sal my kwalik neem indien ek enige fabrikaat bevoordeel of benadeel. Die volgende beskou ek as ‘n noodsaaklikheid binne jou hengelkas:

• Ongeveer 30 Konsentrate in 50ml’s. Ten opsigte van die konsentrate wil ek egter net uitwys dat dit raadsaam sou wees om die volle spectrum van konsentrate in jou kas te hê. My opinie is dat konsentrate in drie tipes verdeel kan word, nl:

  • Soet

  • Sag

  • Sterk of skerp
     

• Ongeveer 20 “Balldips” in 100ml’s. Dit is nie raadsaam om dieselfde konsentraat in ‘n 50ml en ‘n 100ml bottel in jou kas te hê nie. Dis ‘n vermorsing van spasie.
   

• 3 Soorte poeiers soos bv:

  • SA

  • Florenscene

  • Carmoisene
     

• Ongeveer 5 soorte “Floaties.”
   

• Mieliepitte is opsioneel.
   

• Alle benodigdhede om stroppe mee te bind, bv:

  • Verskillende tipe “Swivels”

  • Hoeke

  • Verskillende lyn tipes
     

• Spaar stroppe van die verskillende soorte wat jy gereeld gebruik.
   

• Daar is verskeie hengelaars wat hulle katrolle se spaar spoele in een van die kas se laaie plaas.
   

• ‘n Netjies opgestelde lys van die inhoud van jou hengelkas soos wat dit gemerk of genommer is.

Uitleg van jou kas

Die uitleg binne ‘n hengelkas is baie persoonlik. Baie van die hengelkaste word as ‘n standaard kas verkoop en by sommige vervaardigers kan jy self die uitleg bepaal. Daar is egter ‘n paar riglyne wat ek kan gee om te verseker dat jy jou kas inrig. Die volgende kan jy gebruik as riglyn:

• Plaas die items georden in jou kas. Met ander woorde, sorg dat dieselfde goed alles saam geplaas word. So, die 50ml bottles is almal saam geplaas.
   

• Die tendens is dat die 50ml bottles bo in die kaste geplaas word, aangesien dit gewoonlik die meeste gebruik word.
   

• Die spaar stroppe word gewoonlik in een van die laaie geplaas.
   

• Die spaarspoele word gewoonlik in die laai geplaas.
   

• Voorslag lyn tolle kan ook in die laai geplaas word.
   

• Die houers met die “floaties” word saam geplaas. Dit kan bo in die kas geplaas word of in een van die laaie.
   

• Die items wat benodig word vir stroppe bou, word gewoonlik in ‘n kassie, in ‘n laai geplaas.
   

• Die mieliepit houers kan bo in die kas of in die laai geplaas word.
   

• Die aas waarmee daar gehengel word, bv. deeg, kan in ‘n houer geplaas word, in die laai of bo-in die kas. Sommige hengelaars het ‘n werkskas aan hulle staanders waarin hierdie items geplaas kan word.

Hengelkas Staanders

Die beskikbaarheid van verskillende staanders maak die keuse van die regte staander ook ‘n moeilike besluit. Dit gebeur nog dat die tegnologie verder ontwikkel word, wat ook die maak van die staanders. Die gevolg is dat die ontwerpe gereeld verander om die hengel vir die hengelaars te vergemaklik en te verbeter.

Ek is van mening dat indien ‘n hengelaar ‘n staander gebruik wat reg ontwerp is, dit die prestasie van die hengelaar sal help verbeter. Die rede daarvoor is dat indien die plasing van die items soos die voeremmer, emmer met water, erdwurms, ens. nie op die beste plekke is nie, kan dit die produktiewe aksies rondom die hengelgerei belemmer. Die logika is dus dat dit alles so geplaas word dat jy nie daaroor sal val, dit sal om stamp, ens. indien jy beweeg agter jou hengelkas nie. Die vasslaan van die vis wanneer dit byt moet ook moontlik wees.

Netheid van die hengelkas

'n Hengelaar wat ambisies het om kompeterend in die provinsiale spanne deel te neem, sal die netheid van sy hengelkas en staander moet verseker. Daar word by die keuringsprosesse na die hengelkaste gekyk en die netheid van die hengelgerei tel punte.

Goeie netheid van die hengelkas en staander kan deur middel van die volgende verkry word:

• Die netjies nommering van die proppies en bottles in die kas. Daar is verskeie metodes wat gebruik kan word soos bv. plakkers, gravering, ens.
   

• Netjiese verpakking van alle items in die hengelkas.
   

• Deur te verseker dat alle items binne die hengelkas, die hengelkas self en die hengelkas staander skoon is. Met ander woorde, nie stukke voer en deeg binne die kas en aan die bottels.
   

• Deur te verseker dat die hengelkas staander netjies geverf is.

Die netjiese en professionele toerus van jou hengelkas sal jou trots maak op jou gerei en dit sal vir jou gemaklik en lekker wees om met jou hengelkas te hengel. Sodoende sal jy ‘n goeie stelsel hê wsaarmee jy effektief kan hengel sonder om elke vyf minute te soek na iets.