Donaldson Dam het nog baie vis

Ek was nog oppad dam toe toe ek die eerste oproep kry. Hengelaars op staanplek nommer 5 het deur die nag 5 vis bo 11kg geland! Vir die wat oppad was, was dit genoeg aansporing om vinnig by die dam uit te kom. Die ridders van die skadukolle, oftewel die verskeerspolisie, kan maar hul rekenings stuur.

Dit was ons tweede spesiekarphengel sosiale klub byeenkoms vir die jaar. Ons besoek aan Kwaggas het min vis opgelewer en ons was uitgehonger om groot vis te kry. Dis daarom dat ons besluit het om weer Donaldson dam toe te gaan. Die visvrektes van Desember 2006 was nog vars in ons gedagtes, maar nuus van goeie vangste na die ramp het ons laat besluit om weer die tog na Randfontein aan te pak. Vis tot en met 17kg is in die weke voor ons besoek geland.

Met my aankoms, omtrent elfuur Vrydagoggend, was Gerhard reeds daar en moes ek sommer met die intrapslag fotos neem. Hy het staanplek nommer 2 getrek wat onmiddelik vis tussen 8 en 11 kg begin lewer het. Dis nie aldag wat 'n hengelnaweek so begin nie!

Gerhard het een vis na die ander uitgetrek wat geweeg het tussen 8 en 11 kg. Sy staanplek was beslis die mees produktiefste een vir die naweek. As ek moet raai, dink ek hy het in totaal meer as tien visse geland!

Vrydagaand het ons, soos gewoonlik, die naweek begin met 'n ligte braai. Die verwelkomingsbraai het nou al 'n instelling geword. Dit is 'n puik geleentheid om mede hengelaars te ontmoet en om sommer ook kennis te maak met mede gebruikers van die OutdoorPAGES Forum. Die braai maak dit moontlik om gesigte by die skuilname te plaas. Onglukkig kon almal nie die braai bywoon nie want by Donaldson dam is dit maar moeilik om R 20 000 se toerusting alleen te los. Alhoewel ons nog geen insidente gehad het langs die dam nie, kan 'n mens nie die kans waag nie. Mens weet nooit nie...

Tydens ons braai het Bakgat (Jaco van Tonder) by ons aangesluit. Nicky het hom sommer dadelik 'n visstok in die hand gedruk net om hom welkom te laat voel. Jaco het soos gewoonlik weer 'n hele vrag Bakgat Braai hout en kole geborg wat in die winter glad nie te versmaai is nie. Sy goedgunstigheid was gou beloon toe hy 'n karp van 11kg land, sy grootste sover. Ek kon my oë nie glo nie. Of dit Nicky of Jaco se gelukkige dag was weet ek nie, maar dit moet die karp bo 10kg wees wat met die minste moeite en in 'n rekord tyd gevang is. Onnodig om te sê dat Bakgat geborrel het van vreugde.

Jaco van Tonder (Bakgat) met sy vis van 11 kg

Bakgat (Links) en Nicky vier hul sukses. Geluk of te nie, Nicky en Bakgat het die vis in 'n rekord tyd gevang. Die vis is Bakgat se persoonlike beste!

Ongelukkig moes Bakgat ons verlaat die volgende oggend want hy moes vriende by die lughawe gaan oplaai. Ek is seker hulle het die storie van sy vis oor en oor gehoor tot by die huis. Geluk Bakgat!

Nicky die papgooier

Nicky die spesiekarphengelaar

Kyk, teen die tyd ken almal al vir Nicky, maar partykeer kan ek sy geluk darem nie glo nie. Net nou die dag stop iemand 'n R 3000 se 4-man tent in sy hande, GRATIS. Vroeg Saterdagoggend word Nicky verras met 'n geskenk van Gerhard. Hy ontvang 'n staander (pod) met alarms sommer net so. Om sy geluk af te rond wou ek hom 'n Cheetah hemp gee, maar dié wou hy glad nie hê nie.  

Nico Terblanche met die wenvis van 12.85 kg

Nico (Links) ontvang die prysgeld van Vossie wat die die prys geborg het. (R 1000 Kontant)

Die hengel was oor die algemeen goed. Daar het 'n hele paar vis bo 10kg uitgekom. Richard Boucher het ten minste een baie groot vis verloor om 'n drom in die water. Ander weer het grotes in die riete verloor. Donaldson se grotes het mos maar die slegte gewoonte om in die riete in te jaag. Die weer was aangenaam en oor die algemeen dink ek almal het die naweek geniet.

Soos gewoonlik het die kompetisie tienuur Sondagoggend ge-eindig. Die prysuitdeling het omstreeks halftwaalf begin. Meer as R 3000-00 se pryse is gewen. Die pryse het bestaan uit R 2000 kontant, DVD's, Adventure Fishing 2 rekenaarspeletjies, ens. Vossie, 'n gereelde deelnemer aan ons kompetisies by Donaldson dam, het R 1000 geborg vir die grootste karp. Nico Terblanche met sy vis van 12,85 kg het die prys gewen. Geluk aan Nico en baie dankie aan Vossie vir die borgskap.

Ons het besluit om die OutdoorPAGES R 1000 d.m.v. 'n gelukkige trekking weg te gee. Sodoende kon enige deelnemer, of hy nou vis gevang het of nie, darem 'n kans staan om iets te wen. Nicky Dry (vir die soveelste keer) het die prys gewen.

Die borge vir die byeenkoms was MG Baits, Bakgat Braai, OutdoorPAGES en Vossie. Weereens dankie aan almal wat gehelp het. Hou die "Events" afdeling dop vir die volgende Sosiale Klub Kompetisie.